బాలా కవచం Bala kavacham
బాలా కవచం
అస్య శ్రీబాలాత్రిపురసున్దరీకవచస్తోత్రమహామన్త్రస్య దక్షిణామూర్తిః
ఋషిః । పఙ్క్తిశ్ఛన్దః । బాలాత్రిపురసున్దరీ దేవతా । ఐం బీజం ।
క్లీం శక్తిః సౌః కీలకమ్ । జపే వినియోగః । మూలేన కరాఙ్గ న్యాసౌ ।
దిగ్బన్ధః ధ్యానం - ఐఙ్కారాసన ఇత్యాది సఞ్చారిణీమ్ ॥ లమిత్యాది ।
మన్దిరే సుఖమాసీనం భైరవం చన్ద్రశేఖరమ్ ।
బద్ధాఞ్జలిర్నమస్కృత్య పరిపప్రచ్ఛ పార్వతీ ॥ ౧॥
యది ప్రసన్నో దేవేశ యదివాఽనుగ్రహో మయి ।
బాలాయాః కవచం బ్రూహి సదా కల్యాణసౌఖ్యదమ్ ॥ ౨॥
శివ ఉవాచ -
సాధు సాధు మహేశాని సమ్యక్సమ్యక్చ పృచ్ఛసి ।
యత్ప్రసాదాన్మహేశాని లసత్త్రైలోక్యముత్తమమ్ ॥ ౩॥
తతశ్చరాచరం విశ్వం యతో బ్రహ్మాదయోఽమరాః ।
యద్భ్రూవిలాసవత్ప్రీత్యా సిద్ధయస్త్వణిమాదయః ॥ ౪॥
తద్బాలాపరమేశ్వర్యాః కవచం సర్వసిద్ధిదమ్ ॥
కథయిష్యే శ‍ృణుష్వ త్వం సర్వసౌభాగ్యకారకమ్ ॥ ౫॥
శిరో రక్షతు మే బాలా లలాటే పాతు సున్దరీ ।
కర్ణౌ శ్రీః సర్వదా పాతు నేత్రే కమలవాసినీ ॥ ౬॥
ఓష్ఠమధ్యే విశాలాక్షీ జిహ్వాం పాతు సరస్వతీ ।
ముఖం మనోరమా పాతు చిబుకం మే త్వచఞ్చలా ॥ ౭॥
కణ్ఠం శ్రీకాలికా పాతు బాహూ రక్షతు చణ్డికా ।
కరౌ షడక్షరీ పాతు హృదయం హరివల్లభా ॥ ౮॥
మాతఙ్గీ పాతు మే మధ్యం భవానీ జఠరం మమ ।
నాభిం శ్రీభైరవీ పాతు గుహ్యం కామేశ్వరీ తథా ॥ ౯॥
కటిం పాయాత్కామధాత్రీ జానునీ జగదీశ్వరీ ।
జఙ్ఘే మే త్వరితా పాతు జఙ్ఘపాశ్వేఽశ్వవాహినీ ॥ ౧౦॥
పర్వతస్థా పాతు పాదౌ అఙ్గులీ భూమివాసినీ ।
అగ్రతస్త్రిపురా పాతు పృష్ఠతో మమ భైరవీ ॥ ౧౧॥
దక్షిణే సున్దరీ పాతు వామే మఙ్గలదాయినీ ।
ఊర్ధ్వం జ్యోతిష్మతీ శక్తిః అధోఽనన్తస్వరూపిణీ ॥ ౧౨॥
సర్వశత్రుహరా దుర్గా పాతు మే విజయా రణే ।
గృహం రక్షేద్భద్రకాలీ వాచం వాగ్వాదినీ మమ ॥ ౧౩॥
ఓష్ఠౌ మే మాతృకాః సర్వాః సర్వకార్యేషు సర్వదా ।
ఇత్యేతత్కవచం ప్రోక్తం యః పఠేత్సుసమాహితః ॥ ౧౪॥
దివా వా యది వా రాత్రౌ త్రిసన్ధ్యం భక్తిమాన్నరః ।
జ్ఞాత్వైతత్కవచం పుణ్యం సర్వాన్కామానవాప్నుయాత్ ॥ ౧౫॥
ఇతి శ్రీబాలాకవచం సమ్పూర్ణమ్
All copyrights reserved 2012 digital media act
Comments
Post a Comment