కాలభైరవాష్టకం (శంకరాచార్య కృతం) kalabairava ashtakam sankaracharaya krutham
కాలభైరవాష్టకం (శంకరాచార్య కృతం)
దేవరాజసేవ్యమానపావనాంఘ్రిపఙ్కజం
వ్యాలయజ్ఞసూత్రమిన్దుశేఖరం కృపాకరమ్ ।
నారదాదియోగివృన్దవన్దితం దిగంబరం
కాశికాపురాధినాథకాలభైరవం భజే ॥ ౧॥
భానుకోటిభాస్వరం భవాబ్ధితారకం పరం
నీలకణ్ఠమీప్సితార్థదాయకం త్రిలోచనమ్ ।
కాలకాలమంబుజాక్షమక్షశూలమక్షరం
కాశికాపురాధినాథకాలభైరవం భజే ॥ ౨॥
శూలటంకపాశదణ్డపాణిమాదికారణం
శ్యామకాయమాదిదేవమక్షరం నిరామయమ్ ।
భీమవిక్రమం ప్రభుం విచిత్రతాణ్డవప్రియం
కాశికాపురాధినాథకాలభైరవం భజే ॥ ౩॥
భుక్తిముక్తిదాయకం ప్రశస్తచారువిగ్రహం
భక్తవత్సలం స్థితం సమస్తలోకవిగ్రహమ్ ।
నిక్వణన్మనోజ్ఞహేమకిఙ్కిణీలసత్కటిం
కాశికాపురాధినాథకాలభైరవం భజే ॥ ౪॥
ధర్మసేతుపాలకం త్వధర్మమార్గనాశకం
కర్మపాశమోచకం సుశర్మదాయకం విభుమ్ ।
స్వర్ణవర్ణకేశపాశశోభితాంగమణ్డలం
కాశికాపురాధినాథకాలభైరవం భజే ॥ ౫॥
రత్నపాదుకాప్రభాభిరామపాదయుగ్మకం
నిత్యమద్వితీయమిష్టదైవతం నిరంజనమ్ ।
మృత్యుదర్పనాశనం కరాలదంష్ట్రభూషణం
కాశికాపురాధినాథకాలభైరవం భజే ॥ ౬॥
అట్టహాసభిన్నపద్మజాణ్డకోశసంతతిం
దృష్టిపాతనష్టపాపజాలముగ్రశాసనమ్ ।
అష్టసిద్ధిదాయకం కపాలమాలికాధరం
కాశికాపురాధినాథకాలభైరవం భజే ॥ ౭॥
భూతసంఘనాయకం విశాలకీర్తిదాయకం
కాశివాసలోకపుణ్యపాపశోధకం విభుమ్ ।
నీతిమార్గకోవిదం పురాతనం జగత్పతిం
కాశికాపురాధినాథకాలభైరవం భజే ॥ ౮॥
కాలభైరవాష్టకం పఠంతి యే మనోహరం
జ్ఞానముక్తిసాధనం విచిత్రపుణ్యవర్ధనమ్ ।
శోకమోహలోభదైన్య కోపతాపనాశనం
తే ప్రయాన్తి కాలభైరవాంఘ్రిసన్నిధిం ధ్రువమ్ ॥
॥ ఇతి శంకరాచార్య విరచితం కాలభైరవాష్టకం సమ్పూర్ణమ్ ॥
All copyrights reserved 2012 digital media act
All copyrights reserved 2012 digital media act
Comments
Post a Comment