నృసింహ స్తోత్రం (భాగవత అంతర్గత) nrusimha stotram

నృసింహ స్తోత్రం (భాగవత అంతర్గత) nrusimha stotram 

 శ్రీగణేశాయ నమః 

బ్రహ్మోవాచ 

నతోఽస్మ్యనంతాయ దురంతశక్తయే విచిత్రవీర్యాయ పవిత్రకర్మణే 

విశ్వస్య సర్గస్థితిసంయమాన్గుణైః స్వలీలయా సందధతేఽవ్యయాత్మనే  1

శ్రీరుద్ర ఉవాచ 

కోపకాలో యుగాంతస్తే హతోఽయమసురోఽల్పకః 

తత్సుతం పాహ్యుపసృతం భక్తం తే భక్తవత్సల  2

ఇంద్ర ఉవాచ 

ప్రత్యానీతాః పరమ భవతా త్రాయతాం నః స్వభాగా

దైత్యాక్రాంతం హృదయకమలం త్వద్గృహం ప్రత్యబోధి 

కాలగ్రస్తం కియదిదమహో నాథ శుశ్రూషతాం తే

ముక్తిస్తేషాం న హి బహుమతా నారసింహాపరైః కిం  3

ఋషయ ఊచుః 

త్వం నస్తపః పరమమాత్థ యదాత్మతేజో యేనేదమాదిపురుషాత్మగతం ససర్జ 

తద్విప్రలుప్తమమునాద్య శరణ్యపాల రక్షాగృహీతవపుషా పునరన్వమంస్థాః  4

పితర ఊచుః 

శ్రాద్ధాని నోఽధిబుభుజే ప్రసభం తనూజైర్దత్తాని తీర్థసమయేఽప్యపిబత్తిలాంబు 

తస్యోదరాన్నఖవిదీర్ణవపాద్య ఆర్చ్ఛత్తస్మై నమో నృహరయేఽఖిల ధర్మగోప్త్రే  5

సిద్ధా ఊచుః 

యో నో గతిం యోగసిద్ధామసాధురహారషీద్యోగతపోబలేన .

నానాదర్పం తం నఖైర్నిర్దదార తస్మై తుభ్యం ప్రణతాః స్మో నృసింహ  6

విద్యాధరా ఊచుః 

విద్యాం పృథగ్ధారణయాఽనురాద్ధాం న్యషేధదజ్ఞో బలవీర్యదృప్తః 

స యేన సంఖ్యే పశుబద్ధతస్తం మాయానృసింహం ప్రణతాః స్మ నిత్యం  7

నాగా ఊచుః 

యేన పాపేన రత్నాని స్త్రీరత్నాని హృతాని నః 

తద్వక్షఃపాటనేనాసాం దత్తానంద నమోఽస్తు తే  8

మనవ ఊచుః 

మనవో వయం తవ నిదేశకారిణో దితిజేన దేవ పరిభూతసేతవః 

భవతా ఖలః స ఉపసంహృతః ప్రభో కరవామ తే కిమనుశాధి కింకరాన్  9

ప్రజాపతయ ఊచుః 

ప్రజేశా వయం తే పరేశాభిసృష్టా న యేన ప్రజా వై సృజామో నిషిద్ధాః 

స ఏష త్వయా భిన్నవక్షానుశేతే జగన్మంగలం సత్త్వమూర్తేఽవహారః  10

గంధర్వా ఊచుః .

వయం విభో తే నటనాట్యగాయకా యేనాత్మసాద్వీర్యబలౌజసా కృతాః 

స ఏష నీతో భవతా దశామిమాం కిముత్పథస్థః కుశలాయ కల్పతే  11

చారణా ఊచుః 

హరే తవాంగ్ఘ్రిపంకజం భవాపవర్గమాశ్రితాః 

యదేవ సాధు హృచ్ఛయస్త్వయాఽసురః సమాపితః  12

యక్షా ఊచుః 

వయమనుచరముఖ్యాః కర్మభిస్తే మనోజ్ఞైస్త ఇహ దితిసుతేన ప్రాపితా వాహకత్వం 

స తు జనపరితాపం తత్కృతం జానతా తే నరహర ఉపనీతః పంచతాం పంచవింశః  13

కింపురుషా ఊచుః 

వయం కింపురుషాస్త్వం తు మహాపురుష ఈశ్వర 

అయం కుపురుషో నష్టో ధిక్కృతః సాధుభిర్యదా 14

వైతాలికా ఊచుః 

సభాసు సత్రేషు తవామలం యశో గీత్వా సపర్యాం మహతీం లభామహే 

యస్తాం వ్యనైషీద్భృశమేష దుర్జనో దిష్ట్యా హతస్తే భగవన్యథామయః  15

కిన్నరా ఊచుః 

వయమీశ కిన్నరగణాస్తవానుగా దితిజేన విష్టిమమునాఽనుకారితాః 

భవతా హరే స వృజినోఽవసాదితో నరసింహ నాథ విభవాయ నో భవ  16

విష్ణుపార్షదా ఊచుః 

అద్యైతద్ధరినరరూపమద్భుతం తే దృష్టం నః శరణద సర్వలోకశర్మ .

సోఽయం తే విధికర ఈశ విప్రశప్తస్తస్యేదం నిధనమనుగ్రహాయ విద్మః 17

 ఇతి శ్రీమద్భాగవతాంతర్గతే సప్తమస్కంధేఽష్టమధ్యాయే నృసింహస్తోత్రం సంపూర్ణం