శనైశ్చర కృత నృసింహ స్తోత్రం sanicchara krutha nrusimha stotram
శనైశ్చర కృత నృసింహ స్తోత్రం sanicchara krutha nrusimha stotram
సులభో భక్తియుక్తానాం దుర్దర్శో దుష్టచేతసామ్ ।
అనన్యగతికానాం చ ప్రభుర్భక్తైక వత్సలః ॥ ౧॥
శనైశ్చరస్తత్ర నృసింహదేవస్తుతిం చకారామల చిత్తవృత్తిః ।
ప్రణమ్య సాష్టాఙ్గమశేషలోక కిరీట నీరాజిత పాదపద్మమ్ ॥ ౨॥
శ్రీశనిరువాచ -
యత్పాదపఙ్కజరజః పరమాదరేణ
సంసేవితం సకలకల్మష రాశినాశమ్ ।
కల్యాణకారకమశేశనిజానుగానాం
స త్వం నృసింహ మయి దేహి కృపావలోకమ్ ॥ ౩॥
సర్వత్ర చఞ్చలతయా స్థితయా హి లక్ష్మ్యా
బ్రహ్మాదివన్ద్యపదయా స్థిరయాన్య సేవి ।
పాదారవిన్దయుగలం పరమాదరేణ
స త్వం నృసింహ మయి దేహి కృపావలోకమ్ ॥ ౪॥
యద్రూపమాగమశిరః ప్రతిపాద్యమాద్యం
ఆధ్యాత్మికాది పరితాపహరం విచిన్త్యమ్ ।
యోగీశ్వరైరపగతాఖిల దోష సఙ్ఘైః
స త్వం నృసింహ మయి దేహి కృపావలోకమ్ ॥ ౫॥
ప్రహ్లాద భక్తవచసా హరిరావిరాస
స్తమ్భే హిరణ్యకశిపుం య ఉదారభావః ।
ఉర్వో నిధాయ ఉదరం నఖరైర్దదార
స త్వం నృసింహ మయి దేహి కృపావలోకమ్ ॥ ౬॥
యో నైజభక్తమనలాం బుధి భూధరోగ్ర-
శృఙ్గప్రపాత విషదన్తి సరీసృపేభ్యః ।
సర్వాత్మకః పరమకారుణికో రరక్ష
స త్వం నృసింహ మయి దేహి కృపావలోకమ్ ॥ ౭॥
యన్నిర్వికార పరరూప విచిన్తనేన
యోగీశ్వరా విషయవీత సమస్తరాగాః ।
విశ్రాన్తిమాపుర వినాశవతీం పరాఖ్యాం
స త్వం నృసింహ మయి దేహి కృపావలోకమ్ ॥ ౮॥
యద్రూపముగ్ర పరిమర్దన భావశాలి
సఞ్చిన్తనేన సకలాఘ వినాశకారీ ।
భూతజ్వరగ్రహసముద్భవభీతినాశం
స త్వం నృసింహ మయి దేహి కృపావలోకమ్ ॥ ౯॥
యస్యోత్తమం యశ ఉమాపతి పద్మజన్మ
శక్రాది దైవత సభాసు సమస్తగీతమ్ ।
శక్త్యైవ సర్వశమల ప్రశమైక దక్షం
స త్వం నృసింహ మయి దేహి కృపావలోకమ్ ॥ ౧౦॥
ఇత్థం శ్రుత్వా స్తుతిం దేవః శనినా కల్పితాం హరిః ।
ఉవాచ బ్రహ్మవృన్దస్థం శనిం తం భక్తవత్సలః ॥ ౧౧॥
శ్రీనృసింహ ఉవాచ -
ప్రసన్నోఽహం శనే తుభ్యం వరం వరయ శోభనమ్ ।
యం వాఞ్ఛసి తమేవ త్వం సర్వలోకహితావహమ్ ॥ ౧౨॥
శ్రీశనిరువాచ -
నృసింహ త్వం మయి కృపాం కురు దేవ దయానిధే ।
మద్వాసరస్తవ ప్రీతికరః స్యాద్దేవతాపతే ॥ ౧౩॥
మత్కృతం త్వత్పరం స్తోత్రం శృణ్వన్తి చ పఠన్తి చ ।
సర్వాన్కామాన్పూరయేథాః తేషాం త్వం లోకభావన ॥ ౧౪॥
శ్రీనృసింహ ఉవాచ -
తథైవాస్తు శనేఽహం వై రక్షోభువనసంస్థితః ।
భక్త కామాన్పూరయిష్యే త్వం మమైకం వచః శృణు ॥ ౧౫॥
త్వత్కృతం మత్పరం స్తోత్రం యః పఠేచ్ఛృణుయాచ్చ యః ।
ద్వాదశాష్టమ జన్మస్థాత్ త్వద్భయం మాస్తు తస్య వై ॥ ౧౬॥
శనిర్నరహరిం దేవం తథేతి ప్రత్యువాచ హ ।
తతః పరమసన్తుష్టాః జయేతి మునయోవదన్ ॥ ౧౭॥
శ్రీకృష్ణ ఉవాచ -
ఇదం శనైశ్చరస్యాథ నృసింహదేవ
సంవాదమేతత్ స్తవనం చ మానవః ।
శృణోతి యః శ్రావయతే చ భక్త్యా
సర్వాణ్యభీష్టాని చ విన్దతే ధ్రువమ్ ॥ ౧౮॥
ఇతి శ్రీశనైశ్చరవిరచితా శ్రీనృసింహస్తుతిః సమాప్తా
Comments
Post a Comment