అష్టపది (దేవకీనందనజీ కృతం) astapadi in telugu

అష్టపది (దేవకీనందనజీ కృతం)

జయతి నిజఘోషభువి గోపమణిభూషణం
యువతికలధౌతరతిజటితమవిదూషణం
 ధ్రువపదం

వికచశరదంబురుహరుచిరముఖతోఽనిశం
జిఘ్రతాదమలమధుమదశాలినీ భృశం 1

తరలదలసాపాంగవిభ్రమభ్రామితం
నిఃస్థిరీభవితుమిచ్ఛతు హృదితకామితం 2

మధురమృదుహాసకలితాధరచ్యుతరసం
పిబతు రసనాఽపి ముహురుదితరతిలాలసం 3

అమృతమయశిశిరవచనేషు నవసూత్సుకం
శ్రవణపుటయుగలమనుభవతు చిరసూత్సుకం 4

విపులవక్షస్థలే స్పర్శరసపూరితం
తుంగకుచకలశయుగమస్తు మదనేరితం 5

మృదితతమకాయదేవద్రుమాలంబితా
హర్షమతిశయితముపయాతు తనులతా 6

పుష్పరసపుష్టపరపుష్టభృంగీమయే
వసతిరపి భవతు మమ నిభృతకుంజాలయే 7

గీతమిదమేవమురుభావగర్భితపదం
రోచయతు కృష్ణమిహ సరససంపదం 8

ఇతి శ్రీదేవకీనందనజీకృతాఽష్టపదీ సమాప్తా


All copyrights reserved 2012 digital media act