దశరథకృత శనైశ్చరస్తోత్రం dasaratha krutha shanaishchara stotram in telugu lyrics

దశరథకృత శనైశ్చరస్తోత్రం 

అస్య శ్రీశనైశ్చరస్తోత్రమహామంత్రస్య కాశ్యప ఋషిః
అనుష్ట్ప్ఛందః శనైశ్చరో దేవతా
శం బీజం  నం శక్తిః
మం కీలకం  శనైశ్చరప్రసాదసిద్ధ్యర్థే జపే వినియోగః
శనైశ్చరాయ అంగుష్ఠాభ్యాం నమః
మందగతయే తర్జనీభ్యాం నమః
సౌరాయ అనామికాభ్యాం నమః
శుష్కోదరాయ కనిష్ఠికాభ్యాం నమః
ఛాయాత్మజాయ కరతలకరపృష్ఠాభ్యాం నమః
శనైశ్చరాయ హృదయాయ నమః
మందగతయే శిరసే స్వాహా
అధోక్షజాయ శిఖాయై వషట్
సౌరాయ కవచాయ హుం
శుష్కోదరాయ నేత్రత్రయాయ వౌషట్
ఛాయాత్మజాయ అస్త్రాయ ఫట్
భూర్భువఃసువరోమితి దిగ్బంధః
ధ్యానం
చాపాసనో గృధ్రరథస్తు నీలః ప్రత్యఙ్ముఖః కాశ్యపగోత్రజాతః
సశూలచాపేషుగదాధరోఽవ్యాత్ సౌరాష్ట్రదేశప్రభవశ్చ సౌరిః 1

నీలాంబరో నీలవపుః కిరీటీ గృధ్రాసనస్థో వికృతాననశ్చ
కేయూరహారాదివిభూషితాంగః సదాస్తు మే మందగతిః ప్రసన్నః 2

శనైశ్చరాయ శాంతాయ సర్వాభీష్టప్రదాయినే
నమః సర్వాత్మనే తుభ్యం నమో నీలాంబరాయ చ 3

ద్వాదశాష్టమజన్మాని ద్వితీయాంతేషు రాశిషు
యే యే మే సంగతా దోషాః సర్వే నశ్యంతు వై ప్రభో 4

సూత ఉవాచ
శృణుధ్వం మునయః సర్వే శనిపీడాహరం శుభం
శనిప్రీతికరం స్తోత్రం సర్వాభీష్టఫలప్రదం 5

పురా కైలాసశిఖరే పార్వత్యై శంకరేణ చ
ఉపదిష్టం శనిస్తోత్రం ప్రవక్ష్యామి తపోధనాః 6

రఘువంశేఽతివిఖ్యాతో రాజా దశరథః ప్రభుః
బభూవ చక్రవర్తీ చ సప్తద్వీపాధిపో బలీ 7

కృత్తికాంతే శనౌ యాతే దైవజ్ఞైర్జ్ఞాపితో హి సః
రోహిణీశకటం భిత్వా శనిర్యాస్యతి సాంప్రతం 8

ఇత్థం శకటభేదేన సురాసురభయంకరం
ద్వాదశాబ్దం తు దుర్భిక్షం భవిష్యతి సుదారుణం 9

దేశాశ్చ నగరగ్రామాః భయభీతాః సమంతతః
బ్రువంతి సర్వలోకానాం భయమేతత్సమాగమం 10

ఏవముక్తస్తతో వాక్యం మంత్రిభిః సహ పార్థివః
వ్యాకులం తు జగద్దృష్ట్వా పౌరజానపదాదికం 11

పప్రచ్ఛ ప్రయతో రాజా వసిష్ఠప్రముఖాన్ ఋషీన్
సమాధానం కిమస్యాస్తి బ్రూత మే మునిసత్తమాః 12

ప్రజానాం పరిరక్షాయై సర్వజ్ఞాః సర్వదర్శినః
తచ్ఛ్రుత్వా మునయః సర్వే ప్రోచురస్య బలం మహత్ 13

శనైశ్చరేణ శకటే తస్మిన్ భిన్నే కుతః ప్రజాః
అయం యోగో హ్యసాధ్యం తు శక్రబ్రహ్మాదిభిస్తథా 14

స తు సంచింత్య మనసా సహసా పురుషర్షభః
సమాదాయ ధనుర్దివ్యం దివ్యాయుధసమన్వితం 15

రథమారుహ్య వేగేన గతో నక్షత్రమండలం
సపాదయోజనం లక్షం సూర్యస్యోపరి సంస్థితం 16

రోహిణీం పౄష్ఠ్తః స్థాప్య రాజా దశరథస్తదా
రథే తు కాంచనే దివ్యే సర్వరత్నవిభూషితే 17

హంసవర్ణహయైర్యుక్తే మహాకేతుసముచ్ఛ్రితే
దీప్యమానో మహారక్తకిరీటకటకాదిభిః 18

బభ్రాజ స తదాకాశే ద్వితీయ ఇవ భాస్కరః
ఆకర్ణపూర్ణచాపేన సంహారాస్త్రం న్యయోజయత్ 19

సంహారాస్త్రం శనిర్దృష్ట్వా సురాసురభయంకరం
కృత్తికాంతే తదా స్థిత్వా ప్రవిశన్ కిల రోహిణీం 20

దౄష్ట్వా దశరథం చాగ్రే తస్థౌ స భ్రుకుటీముఖః
హసిత్వా తద్భయాత్సౌరిరిదం వచనమబ్రవీత్ 21

పౌరుషం తవ రాజేంద్ర సురాసురభయంకరం
దేవాసురమనుష్యాశ్చ సిద్ధవిద్యాధరోరగాః 22

మయావలోకితాః సర్వే దైన్యమాశు వ్రజంతి తే
తుష్టోఽహం తవ రాజేంద్ర తపసా పౌరుషేణ చ 23

వరం బ్రూహి ప్రదాస్యామి మనసా యదభీప్సితం
దశరథ ఉవాచ
(ప్రసాదం కురు మే సౌరే వరదో యది మే స్థితః )
అద్య ప్రభృతి మే రాష్ట్రే పీడా కార్యా న కస్యచిత్ 24

రోహిణీం భేదయిత్వా తు న గంతవ్యం త్వయా శనే
సరితః సాగరాః సర్వే యావచ్చంద్రార్కమేదినీ 25

ద్వాదశాబ్దం తు దుర్భిక్షం న కదాచిద్భవిష్యతి
యాచితం తు మయా సౌరే నాన్యమిచ్ఛామ్యహం వరం 26

ఏవమస్త్వితి సుప్రీతో వరం ప్రాదాత్తు శాశ్వతం
కీర్తిరేషా త్వదీయా చ త్రైలోక్యే సంభవిష్యతి 27

ప్రాప్య చైనం వరం రాజా కృతకృత్యోఽభవత్తదా
ఏవం వరం తు సంప్రాప్య హృష్టరోమా స పార్థివః 28

రథోపస్థే ధనుః స్థాప్య భూత్వా చైవ కృతాంజలిః
ధ్యాత్వా సరస్వతీం దేవీం గణనాథం వినాయకం 29

రాజా దశరథః స్తోత్రం సౌరేరిదమథాకరోత్
దశరథ ఉవాచ
నమః కృష్ణాయ నీలాయ శిఖికంఠనిభాయ చ 3౦

నమో నీలముఖాబ్జాయ నీలోత్పలనిభాయ చ
నమో నిర్మాంసదేహాయ దీర్ఘశ్మశ్రుజటాయ చ 31

నమో విశాలనేత్రాయ శుష్కోదర భయానక
నమః పరుషనేత్రాయ స్థూలరోంణే నమో నమః 32

నమో నిత్యం క్షుధార్తాయ అతృప్తాయ నమో నమః
నమో దీర్ఘాయ శుష్కాయ కాలదంష్ట్రాయ తే నమః 33

నమస్తే ఘోరరూపాయ దుర్నిరీక్ష్యాయ తే నమః
నమో ఘోరాయ రౌద్రాయ భీషణాయ కరాళినే 34

నమస్తే సర్వభక్షాయ వలీముఖ నమోస్తు తే
సూర్యపుత్ర నమస్తేస్తు భాస్కరోఽభయదాయినే 35

అధోదృష్టే నమస్తేఽస్తు సంవర్తక నమో నమః
నమో మందగతే తుభ్యం నిస్త్రింశాయ నమో నమః 36

నమో దుఃసహదేహాయ నిత్యయోగరతాయ చ
జ్ఞానదృష్టే నమస్తేఽస్తు కశ్యపాత్మజసూనవే 37

తుష్టో దదాసి త్వం రాజ్యం క్రుద్ధో హరసి తత్క్షణాత్
దేవాసురమనుష్యాశ్చ సిద్ధవిద్యాధరోరగాః 38

త్వయావలోకితాః సర్వే దైన్యమాశు వ్రజంతి తే
బ్రహ్మా శక్రో యమశ్చైవ ఋషయః సప్త సాగరాః 39

రాజ్యభ్రష్టా భవంతీహ తవ దృష్ట్యావలోకితాః
దేశాశ్చ నగరగ్రామాః ద్వీపాశ్చ గిరయస్తథా 40

సరితః సాగరాః సర్వే నాశం యాంతి సమూలతః
ప్రసాదం కురు మే సౌరే వరదోఽసి మహాబల 41

ఏవముక్తస్తదా సౌరిః గ్రహరాజో మహాబలః
అబ్రవీచ్చ శనిర్వాక్యం హృష్టరోమా స భాస్కరిః 42

శనిరువాచ
తుష్టోఽహం తవ రాజేంద్ర స్తోత్రేణానేన సువ్రత
వరం బ్రూహి ప్రదాస్యామి మనసా యదభీప్సితం 43

దశరథ ఉవాచ
ప్రసన్నో యది మే సౌరే పీడాం కురు న కస్యచిత్
దేవాసురమనుష్యాణాం పశుపన్నగపక్షిణాం 44

శనిరువాచ
గ్రహణాచ్చ గ్రహాజ్ఞేయాః గ్రహాః పీడాకరాః స్మౄతాః
అదేయోఽపి వరోఽస్మాభిః తుష్టోఽహం తు దదామి తే 45

దేవాసురమనుష్యాశ్చ సిద్ధవిద్యాధరోరగాః
పశుపక్షిమృగా వృక్షాః పీడాం ముంచంతు సర్వదా 46

త్వయా ప్రోక్తమిదం స్తోత్రం యః పఠేదిహ మానవః
ఏకకాలం క్వచిత్కాలం పీడాం ముంచామి తస్య వై 47

మృత్యుస్థానగతో వాపి జన్మవ్యయగతోఽపి వా
పఠతి శ్రద్ధయా యుక్తః శుచిః స్నాత్వా సమాహితః 48

శమీపత్రైః సమభ్యర్చ్య ప్రతిమాం లోహజాం మమ
మాషౌదనం తిలైర్మిశ్రం దద్యాల్లోహం తు దక్షిణాం 49

కృష్ణాంగాం మహిషీం వస్త్రం మాముద్దిశ్య ద్విజాతయే
మద్దినే తు విశేషేణ స్తోత్రేణానేన పూజయేత్ 50

పూజయిత్వా జపేత్స్తోత్రం భుక్త్వా చైవ కృతాంజలిః
తస్య పీడాం న చైవాహం కరిష్యామి కదాచన 51

గోచరే జన్మలగ్నే వా దశాస్వంతర్దశాసు చ
రక్షామి సతతం తస్య పీడాస్వన్యగ్రహస్య చ 52

అనేనైవ ప్రకారేణ పీడాముక్తం జగద్భవేత్
సూత ఉవాచ
వరద్వయం తు సంప్రాప్య రాజా దశరథస్తదా 53

మేనే కృతార్థమాత్మానం నమస్కృత్య శనైశ్చరం
శనినా చాభ్యనుజ్ఞాతః స్వస్థానమగమత్ నృపః 54

స్వస్థానం చ తతో గత్వా ప్రాప్తకామోఽభవత్తదా
కోణః శనైశ్చరో మందః ఛాయాహృదయనందనః 55

మార్తాండజస్తథా సౌరిః పాతంగిర్గ్రహనాయకః
బ్రహ్మణ్యః క్రూరకర్మా చ నీలవస్త్రోఽఞ్జనద్యుతిః 56

ద్వాదశైతాని నామాని యః పఠేచ్చ దినే దినే
విషమస్థోఽపి భగవాన్ సుప్రీతస్తస్య జాయతే 57

మందవారే శుచిః స్నాత్వా మితాహారో జితేంద్రియః
తద్వర్ణకుసుమైర్యుక్తం సర్వాంగం ద్విజసత్తమాః 58

పూరయిత్వాన్నపానాద్యైః స్తోత్రం యః ప్రయతః పఠేత్
పుత్రకామో లభేత్పుత్రం ధనకామో లభేద్ధనం 59

రాజ్యకామో లభేద్రాజ్యం జయార్థీ విజయీ భవేత్
ఆయుష్కామో లభేదాయుః శ్రీకామః శ్రియమాప్నుయాత్ 60

యద్యదిచ్ఛతి తత్సర్వం భగవాన్ భక్తవత్సలః
చింతితాని చ సర్వాణి దదాతి చ న సంశయః 61

ఇతి శ్రీ దశరథమహారాజకృతం శనైశ్చరస్తోత్రం సంపూర్ణం



All copyrights reserved 2012 digital media act