దుర్గాష్టకం durga ashtakam

దుర్గాష్టకం

కాత్యాయని మహామాయే ఖడ్గబాణధనుర్ధరే

ఖడ్గధారిణి చండి దుర్గాదేవి నమోఽస్తు తే 1

వసుదేవసుతే కాలి వాసుదేవసహోదరి

వసుంధరాశ్రియే నందే దుర్గాదేవి నమోఽస్తు తే 2

యోగనిద్రే మహానిద్రే యోగమాయే మహేశ్వరి

యోగసిద్ధికరీ శుద్ధే దుర్గాదేవి నమోఽస్తు తే 3

శంఖచక్రగదాపాణే శార్ఙ్గజ్యాయతబాహవే

పీతాంబరధరే ధన్యే దుర్గాదేవి నమోఽస్తు తే 4

ఋగ్యజుస్సామాథర్వాణశ్చతుస్సామంతలోకిని

బ్రహ్మస్వరూపిణి బ్రాహ్మి దుర్గాదేవి నమోఽస్తు తే 5

వృష్ణీనాం కులసంభూతే విష్ణునాథసహోదరి

వృష్ణిరూపధరే ధన్యే దుర్గాదేవి నమోఽస్తు తే 6

సర్వజ్ఞే సర్వగే శర్వే సర్వేశే సర్వసాక్షిణి

సర్వామృతజటాభారే దుర్గాదేవి నమోఽస్తు తే 7

అష్టబాహు మహాసత్త్వే అష్టమీ నవమి ప్రియే

అట్టహాసప్రియే భద్రే దుర్గాదేవి నమోఽస్తు తే 8

దుర్గాష్టకమిదం పుణ్యం భక్తితో యః పఠేన్నరః

సర్వకామమవాప్నోతి దుర్గాలోకం స గచ్ఛతి 9