నవగ్రహ స్తోత్రం (వ్యాసకృతం) navagraha stotram in telugu

నవగ్రహ స్తోత్రం (వ్యాసకృతం)

జపాకుసుమసంకాశం కాశ్యపేయం మహాద్యుతిం
తమోఽరిం సర్వపాపఘ్నం ప్రణతోఽస్మి దివాకరం 1

దధిశంఖతుషారాభం క్షీరోదార్ణవసంభవం
నమామి శశినం సోమం శంభోర్ముకుటభూషణం 2

ధరణీగర్భసంభూతం విద్యుత్కాంతిసమప్రభం
కుమారం శక్తిహస్తం తం మంగలం ప్రణమామ్యహం 3

ప్రియంగుకలికాశ్యామం రూపేణాప్రతిమం బుధం
సౌమ్యం సౌమ్యగుణోపేతం తం బుధం ప్రణమామ్యహం 4

దేవానాం చ ఋషీణాం చ గురుం కాంచనసంనిభం
బుద్ధిభూతం త్రిలోకేశం తం నమామి బృహస్పతిం 5

హిమకుందమృణాలాభం దైత్యానాం పరమం గురుం
సర్వశాస్త్రప్రవక్తారం భార్గవం ప్రణమామ్యహం 6

నీలాంజనసమాభాసం రవిపుత్రం యమాగ్రజం
ఛాయామార్తండసంభూతం తం నమామి శనైశ్చరం 7

అర్ధకాయం మహావీర్యం చంద్రాదిత్యవిమర్దనం
సింహికాగర్భసంభూతం తం రాహుం ప్రణమామ్యహం 8

పలాశపుష్పసంకాశం తారకాగ్రహమస్తకం
రౌద్రం రౌద్రాత్మకం ఘోరం తం కేతుం ప్రణమామ్యహం 9

ఇతి వ్యాసముఖోద్గీతం యః పఠేత్సుసమాహితః
దివా వా యది వా రాత్రౌ విఘ్నశాంతిర్భవిష్యతి 10

నరనారీనృపాణాం చ భవేద్దుఃస్వప్ననాశనం
ఐశ్వర్యమతులం తేషామారోగ్యం పుష్టివర్ధనం

గ్రహనక్షత్రజాః పీడాస్తస్కరాగ్నిసముద్భవాః
తాః సర్వాః ప్రశమం యాంతి వ్యాసో బ్రూతే న సంశయః

ఇతి శ్రీవ్యాసవిరచితం నవగ్రహస్తోత్రం సంపూర్ణం
All copyrights reserved 2012 digital media act