సోమోత్పత్తిస్తోత్రం (యాజుర్వైదికీ పారమాత్మికోపనిషదంతర్గతం) somotpatti stotram in telugu lyrics

సోమోత్పత్తిస్తోత్రం (యాజుర్వైదికీ పారమాత్మికోపనిషదంతర్గతం)

  హరిః ఓం

ఋషయ ఊచుః -
కౌతూహలం సముత్పన్నం దేవతా ఋషిభిః సహ
సంశయం పరిపృచ్ఛంతి వ్యాసం ధర్మార్థకోవిదం 1

కథం వా క్షీయతే సోమః క్షీణో వా వర్ధతే కథం
ఇమం ప్రశ్నం మహాభాగ బ్రూహి సర్వమశేషతః 2

వ్యాస ఉవచ -
శృణ్వంతు దేవతాః సర్వే యదర్థమిహ ఆగతాః
తమర్థం సంప్రవక్ష్యామి సోమస్య గతిముత్తమాం 3

అగ్నౌ హుతం చ దత్తం చ సర్వం సోమగతం భవేత్
తత్ర సోమః సముత్పన్నః స్మితాంశుహిమవర్షణః 4

అష్టాశీతి సహస్రాణి విస్తీర్ణో యోజనాని తు
ప్రమాణం తత్ర విజ్ఞేయం కలాః పంచదశైవ తత్ 5

షోడశీ తు కలాప్యత్ర ఇత్యేకోఽపి విధిర్భవేత్
తం చ సోమం పపుర్దేవాః పర్యాయేణానుపూర్బశః 6

ప్రథమాం పిబతే వహ్నిః  ద్వితియాం పిబతే రవిః
విశ్వేదేవాస్తృతీయాం తు చతుర్థీం సలిలాధిపః 7

పంచమీం తు వషట్కారః షష్టీం పిబత వాసవః
సప్తమీం ఋషయో దివ్యాః అష్టమీమజ ఏకపాత్ 8

నవమీం కృష్ణపక్షస్య యమః ప్రాశ్నాతి వై కలాం
దశమీం పిబతే వాయుః పిబత్యేకాదశీముమా 9

ద్వాదశీం పితరః సర్వే సంప్రాశ్నంతి  భాగశః
త్రయోదశీం ధనాధ్యక్షః కుబేరః పిబతే కలాం 10

చతుర్దశీం పశుపతిః పంచదశీం ప్రజాపతిః
నిష్పీత ఏకకలాశేషః చంద్రమా న ప్రకాశతే 11

కలా షోడశకాయాం తు ఆపః ప్రవిశతే సదా
అమాయాం తు సదా సోమః ఓషధిః ప్రతిపద్యతే 12

తమోషధిగతం గావః పిబంత్యంబుగతం చ యత్
యత్క్షీరమమృతం భూత్వా మంత్రపూతం ద్విజాతిభిః 13

హుతమగ్నిషు యజ్ఞేషు పునరాప్యాయతే శశీ
దినే దినే కలావృద్ధిః పౌర్ణిమాస్యాం తు పూర్ణతః 14

నవో నవో భవతి జాయమానోఽహ్నాం కేతురుషసామేత్యగ్రే .
భాగం దేవేభ్యో విదధాత్యాయన్ ప్రచంద్రమాస్తగతి  దీర్ఘమాయుః 15

త్రిముహూర్తం వసేదర్కే త్రిముహూర్తం జలే వసేత్
త్రిముహూర్తం వసేద్గోషు త్రిముహూర్తం వనస్పతౌ 16

వనస్పతిగతే సోమే యస్తు హింస్యాద్వనస్పతిం
ఘోరాయాం బ్రూణహత్యాయాం యుజ్యతే నాత్ర సంశయః 17

వనస్పతిగతే సోమే అనడుహో యస్తు వాహయేత్
నాశ్నంతి పితరస్తస్య దశవర్షాణి పంచ చ 18

వనస్పతిగతే సోమే పంథానం యస్తు కారయేత్
గావస్తస్య ప్రణశ్యంతి చిరకాలముపస్థితాః 19

వనస్పతిగతే సోమే స్త్రియం వా యోఽధిగచ్ఛతి
స్వర్గస్థాః పితరస్తస్య చ్యవంతే నాత్ర సేశయః 20

వనస్పతిగతే సోమే పరాన్నం యస్తు భుంజతి
తస్య మాసకృతో హోమః దాతారమధిగచ్ఛతి 21

వనస్పతిగతే సోమే యః కుర్యాద్దంతధావనం
చంద్రమా భక్షితో యేన పితృవంశస్య ఘాతకః 22

సోమోత్పత్తిమిమాం యస్తు శ్రాద్ధకాలే సదా పఠేత్
తదన్నమమృతం భూత్వా పితౄణాం దత్తమక్షయం 23

సోమోత్పత్తిమిమాం యస్తు గుర్విణీం శ్రావయేత్ప్రియాం
ఋషభం జనయేత్పుత్రం సర్వజ్ఞం వేదపారగం 24

సోమోత్పత్తిమిమాం యస్తు పర్వకాలే సదా పఠేత్
సర్వాన్ కామానవాప్నోతి సోమలోకం స గచ్ఛతి 25

శ్రీసోమలోకం స గచ్ఛత్యోం నమ ఇతి

శుక్లే దేవాన్, పితౄన్ కృష్ణే, తర్పయత్యమృతేన చ
యశ్చ రాజా ద్విజాతీనాం తస్మై సోమాత్మనే నమః 26

ఇతి సోమోత్పత్తిః స్తోత్రం సంపూర్ణం

All copyrights reserved 2012 digital media act